2Ti 1 | MHL | STEP | Yo Pol-ke parosifa fain no Timoti siisimomiyem, yo Krais Yeesus uuwow mua nain. Mua Maneka ona kookalep efa sesekeya ikiwep Krais Yeesus wameiya-pa eliw ikowa opora yia maep koonowak nain wia maakem-miawiyem. Aria yena muuka eliwa, feenap nefa naiyem, yiena Auwa Mua Maneka ne yiena Maneka Krais Yeesus ikos nefa kemalep nefa saliwiwkin no kema sonom eliwa ikainan.

2 Timothy 1

1 Yo Pol-ke parosifa fain no Timoti siisimomiyem, yo Krais Yeesus uuwow mua nain. Mua Maneka ona kookalep efa sesekeya ikiwep Krais Yeesus wameiya-pa eliw ikowa opora yia maep koonowak nain wia maakem-miawiyem. Aria yena muuka eliwa, feenap nefa naiyem, yiena Auwa Mua Maneka ne yiena Maneka Krais Yeesus ikos nefa kemalep nefa saliwiwkin no kema sonom eliwa ikainan.

Timoti kekanowowa opora

3 Yo no nefa kema suuwap anane amirika ne uura Mua Maneka faremi sira eliwa naakiyem, o eena iiriw yena nembesir pun faremi lotu onam-ikemik nain. Ne yos pun o uuwomami kema melina ikem yame naiyem. 4 No omon nain nefa kema suuwiyem. Naapeya nefa urufowa naem-ikaiyem, nefa urufap manek akena kemelinen naiyem. 5 No Krais opora baliwep wiar opap ikon nain pun yo nefa kema suuwiyem, iiriw nena neene Yunis ne nokome Lois opam-ikemik naap. Ne aakisa nos pun naap opam-ikain nefa amisarem. 6 Iiriw yo wapena ikiwosa iinan-pa nefar wuamkun Mua Maneka Ewar Eliwa-ke nefa kekanowami uuwowa niek. Naapeya aakisa opora-pa nefa kekanowiyem, uuwowa nain baliwep uuw-ikim-ikaeya manekarinok, mukuna manekimik naap. 7 Moram Mua Maneka eena Ewar yiek nain me maa keker opaka naep yiek, weetak. Ewar Eliwa nain-ke yiamiya ikaeya kekanep ikemik, ne wia kookalimik ne maa kema suuwap onimik.

8 Naapeya yiena Maneka opora wia maakowa nain emina me urure, ne yo o muuta nain koora ekap ikem fain pun kema suuwap emina me urure. No Mua Maneka kekanowa niem-ikaiya nain, naap kekanep ona opor eliwa wia maakemi yo efamiya sirirowa eliw aawe. 9 Mua Maneka ona yia saliwami yia aawok, yena teeria kakeniw-ke yia naep. Nain me i maa mauwa eliwa onamkun yia aawok, weetak. Iiriw ekera miiwa maa me tawerarowa ikok ona yia kemalep Yeesus Krais-pa yia aawowa maep-puak. 10 Ne aakisa fan ona opora yia opomami Yeesus Krais yia aawinok naep sesekeya imenarek. O umowa kekanowa iiwawun nomakep weeser-wuak. Ne ona opor eliwa-pa yia parinaroweya anane eliwa ikowa nain amisaremik. 11 Ne yo opor eliwa nain wia maakowa naep ona efa pepekimok. Naeya yo o uuwow mua ne somek mua arep opora wia wafuram-miawomiyem. 12 Ne yo uuwowa muuta nain anane sirirowa aawiyem, nain emina me ururiyem. Moram Yeesus eena opora wiar opiyem nain baliwep akena amisarem. Ne pun kekanep feenap maiyem, makena, o uuwowa wapena-pa efar wuak nain naap efa urufam-ikaiya, ikip ikip iiwawun ona ekapow fofa-pa.

13 Aria yo opora nefa maakem nain no iiwawun kakeniw naap wia maake. Ne Yeesus Krais opora baliwep wiar opap, ona yia kookaliya nain naap wia ofakowam-ike. 14 Uuwow eliwa Mua Maneka no wapena-pa wuomek nain kakeniw naap kakaltam-ike. Ewar Eliwa eena yiamiya ikaiya nain-ke nefa asipam-ikaeya naap uuwam-ikainan.

15 Aria no amisaren, wi Esia kame unowa nain yo efa piipuamik. Figelus Ermogenes ikos pun naap, yo efa piipuamik.

16 Ne Onesiforus-ke wiisak, os-ke anane efa karuemi efa kekanowam-ikua. Yo koora-pa efa wuap seniw efa kaikamik nain emina me efa ururek, weetak. Ne Rom ekapok nain me walimak, efa akupam-miok efa imenak. Naapeya Mua Maneka fariyem, ona teeria unow onaiya wia kemalep wia naapinok naiyem. 18 Ne pun feenap naiyem, Mua Maneka o kemalep ikoka yiena Maneka ekapow fofa-pa asipeya samor me aawinok. Yo iiriw Efesus-pa ikem nain pun manek akena efa asipam-ikua nain no baliwep amisaren.